እግዚአብሔር ውለታ ሊውልልህ ሲፈልግ ሰዎች በማያወቁት ሸለቆ ያሳልፍሃል። ወንድሞችህ በጭካኔ አንተን ገፍትረውህ የጣሉበትን ጉድጓድ ጥልቀቱን እንኳን አያውቁትም ። በማያውቁት ሸለቆ ውስጥ ያሳልፍሃል ፤ በማያውቁት በረሃ ይመግብሃል ፤ በማያውቁት ማዕበል ውስጥ ያሳልፍሃል ፤ በማያውቁት ገደል ላይ ድልድይ ሆኖ ያሻግርሃል ፤ ለማያውቁት ብቸኝነትህ የልብ ወዳጅ ያጎናፅፍሃል። እነሱ ገፍትረው መጣላቸውን እንጂ ጉድጓድህን ፤ ሸለቆህን ፤ በረሃህን፤ ማዕበልህን፤ ብቸኝነትህን አያውቁልህም እግዚአብሔር ግን ሁሉን ያውቅልሃል አሳልፎልሃል። ሌሎች የሠጠሙበትን ማዕበል አንተ የተሻገርከው አስተዋይ ስለሆንክ ሳይሆን ጌታ ስለ ራራልህ ነው። መልካም ስለሆንክ ሳይሆን እግዚአብሔር ስላዘነልህ ነው። ዛሬ ላይ ሰው ሆነህ መቆምህ ለእነርሱም ጥቅም ስለሆነ እግዚአብሔር ስለ አንተ ብቻ ሳይሆን ስለ እነርሱ አይጥልህም። እግዚአብሔር አይደለም ከሌላው ከራስህ እንኳን ያድንሃል። ከመጣል መሃል እጅግ ክፉው መጣል ባለቤት ለሌለው ክፋት ተላልፎ መጣል ነው ። ቢያንስ ለሚደርስብህ ጥፋት ተጠያቂ ይኖራል ። የራስ ሰው ሲጥልህ ግን የወደቅህበትን አታውቀውም ስለዚህ አንተም ራስህን ትጥለዋለህ ፤ አየህ እግዚአብሔር ከዚህ እንኳን ነው ያዳነህ። በአንዳንድ የሕይወት መስመሮች ወድቀን የተነሳን ይመስለናል ግን ዞር ብለን ስናስተውለው ገና ሳንወድቅ በመንገዳገድ ላይ እያለን ነው ውዳችን የደረሰልን እና ያነሳን ። የወደቅን የመሰለን አወዳደቃችን እጅግ ሃይለኛ በመሆኑ ፤ መንገዳገዳችን ራሱ አስፈሪ በመሆኑ ነው። እግዚአብሔር እስክትወድቅ አይጠብቅም ቀድሞ ያነሳሃል! እግዚአብሔር ደግ ነው ። አንድ ነገር እናስተውል በማንም ጉድለት ማንም ሞልቶለት አያውቅም በማንም ሙላት ማንም ጎድሎበት አያውቅም ። ማንሳት ባንችል እንኳን አንግፋ መደገፍ ባንችል እንኳን አናሳድድ ማፅናት ባይሆንልን እንኳን አንጣል ። ጥሎ ማለፍ ለአለም እንጂ ለክርስትያን አይሰራም አብሮ ማለፍ ውዴታችን ብቻ ሳይሆን ግዴታችን ነው። 

      ከሁላችሁ የማንስ ታናሽ ወንድማችሁ ዲያቆን ሐዋዝ ተገኝ።